LZI Kalsuan zia etteh huai thu
Leitungbup Zomi Innkuan kipawlna min tawh a ki vaihawm ahi, November 2010 sung, Tonzang leh Tedim kikal a tuahsiate galna leh siatvatna ding vaihawmnate a hunzui in zo to thei zeel ihih man in i lungdam hi.
Hih bang in kicing tak in theihsakna muthei ihih man in lungdam mahmah hi.
Zogam leh Zomi bup huam kipawlna khat I neih sun ahi ih LZI i mission trip vai i sim khak ciang lunkim huai kasa hi.
I vaihawm dante zong etteh huai leh ciapteh tak hi. A diakdiak in i sum leh paai hawm dante ah a tamzaw i thukimdan lian in i kalsuan theih loh hang, a tawmzaw i deihna thupi simsakna tawh expense a tawm theithei ding in zeek theih na ding, khiapna nei thei ihih man in Democracy vai mahmah ahih ban ah Innkuan lungsim nei takpi ihihna kilang a, thupi kasa hi.
A tuahsiate i khua leh tui va sik ngiat ding uh cih pen thupi kan lai hi. Mun khat ah kaikhawm ziau leh zong hi thei a, ahih kei leh mimal khat leh nih va pai ziau in, va puak ziau leh zong ahi thei thu hi. Sum tawm bei pen ding ci-in Vangleng antang khiat bang in khiat ziau, khak sawn ziau, gal lot ziau zong ahi thei hi.
Hi mah tase leh i mipihte' ki tangsappi pen ahi sum leh paai ban ah, nat leh sat khit, lau thawngna leh dipkuatna hun khit in Leitung thu, Khathu tawh tha pia ngiat, thu leh la kikup pih ngiat in, thungetna leh sum leh paai tawh panpihna a nei thei ding suak ihih man in Zomi bup bek thamlo mi khempeuh' i etteh tak nasep zia leh kalsuan ziapi khat ahi hi.
Laito pa/ laihawmpa in a tavuan nasepna in lai a piak ziau dan bang hi samlo in, cinate, misite' khua leh tui va siik ngiat ngiat ding cih pen LZI i lim leh meel hong na pulak ding uh, sum leh paai a pia khia tuipi gal a om Zomi mipite' itna va pulak khia ngiat ding uh ahih man in manpha mahmah hi. Cina damkang khat peuh, gim leh tawl leh lauthawng tawh dipkua a a om king kiang lai khat sum ngah ding ci in va sam khialo zaw a, amau omna ciang dong I va puak zawhna pen mipi I thusimna, mimal I khualna ahi a Zomi sung ah i ki taang sap mahmah thu ahi hi.
Khua kiim, khua paam a om makai muanhuai khat leh nih peuh ki vai khak ziau thei mah ding hi.
Ahih hang in kipawlna min ngiat tawh pai in, tha piakna pen Zomi mipi leh i Kipawlnapi hong kizom sak ahih ban ah, khua leh tui makaite, Siate, U Lian makaite tuamtuamte tawh ki lawmtakna bawl theihna pen a manpha pen hun leh I kisap pen thu khat ahi hi.
Tutung LZI tang in Zogam khua tuamtuamte sik in ong na paisakna tungtawn un mailam ah Zogam I zuun na ding ah koi mun ah, bang teng kisam cih (need assessment) ong na bawl kawm pah uh zong suak hi. Mimal khat leh nih I gal gensawn bek hilo in, I kipawlnapi tang in a mit tawh va mu, amau ngiat in va kan ding uh a, thu leh la tampi hong puak kik thei ding uh (Zogam I ki tansapna, LZI I mabante) ong pulak thei ding uh ahih man in I nasapnate hong tangzai to tektek ahihna kimu khin zo in, angtan huai mahmah hi.
I tanu palaite cidam ludam in a khualzinna uh hong zo uh hen la, thu hoih la hoih a za kik thei ding in mimal kim ciat Topan' thupha hong piak sak ta hen.
Lungdam.
Sianpu
January 23, 2011
KL
0 comments:
Post a Comment